நாட்கள் நகர்கின்றன ...

உயர்கல்வி பெறுவதற்காய்
போட்டிப் பரீட்சை
எழுதிக் களைத்திருந்த
அந்த இனிய நாட்கள்......


சுபநேரம் பார்ப்பவர்கள்
மத்தியில்
விழிப்பதற்கும் நேரம்
பார்த்திட்ட நாட்கள்


வித்திட்டு வளர்த்த
பள்ளிதனை
மீண்டும் மீண்டும்
நலம் விசாரித்த நாட்கள்


வாழ்வின் நெருங்கிய
அங்கமாகிவிட்ட சகாக்கள் சகிதம்
வெட்டிப் பேச்சு
பேசிய நாட்கள்


இன்பம் மட்டுமே
தென்றலாய் வீசும் மனையில்
உற்சாகமாய்
வளைய வந்த நாட்கள்


அரங்கமே அதிர்ந்திட
அபிமான நட்சத்திரத்தின்
திரைப்படம்தனை கைதட்டி
சிலாகித்த நாட்கள்


பார்த்தறிந்த இடம்தனில்
சுற்றித் திரிந்த போது
முடிசூடா மன்னனாய்
உவகை கொண்ட நாட்கள் ........


மன்றாடிக் கேட்பினும்
காலம் தன் ஓட்டத்தை
எனக்காக
நிறுத்தத் தயாரில்லை


நாட்கள் நகர்ந்தன
வெற்றிகளும் கிடைத்தன
வெற்றிகளின் பலனாய்
மேற்கண்ட இன்பங்களும் பறிபோயின


உயர்கல்வி கற்றிடவே
சொந்தம் ந்ட்பு துறந்து
இனந்தெரியா மனிதரிடையே
வாழ வேண்டிய கட்டாயம்


அன்று இன்பமாய்
கழிந்த நாட்கள் - இன்று
நாட்காட்டி பார்த்தே ஏக்கத்துடன்
கழிந்து போகின்றன


ஆம், என் ஒட்டுமொத்த
இன்பத்திற்குமாய்
காலம் இட்ட
கடிவாளம் -
என் விடுதி வாழ்க்கை !